Школа сярэдняя Порплішчанская, ДУА. Докшыцкі раён, аг. Порплішча

Подробности

Створана 18.04.2017 08:40

Адноўлена 30.07.2019 10:42

Царкоўна-прыходская школа ў в. Порплішча была адкрыта ў 1864 годзе з двухгадовым тэрмінам навучання. У канцы 90-х гадоў тэрмін навучання быў павялічаны да трох гадоў. Заняткі праходзілі ў асноўным зімой. У 1886/1887 навучальным годзе ў школе вучылася 33 хлопчыкі.

У час рэвалюцыйных падзей і грамадзянскай вайны школа не працавала. У 1921 годзе з прыходам белапалякаў школа зноў пачала працаваць. Выкладанне вялося на польскай мове. Пачатковая школа паступова пераўтварылася ў сямігодку. Школа з польскай мовай навучання праіснавала да верасня 1939 года. Пасля аб'яднання Беларусі яна па-ранейшаму заставалася сямігадовай, але выкладанне вялося на роднай мове. У гэты час павялічваецца колькасць вучняў, ствараецца піянерская і камсамольская арганізацыі.

У гады Вялікай Айчыннай вайны, з восені 1941 года па ліпень 1944 года, школа не працавала. Будынкі былі пераўтвораны ў казармы для нямецкіх салдат. Пасля вызвалення, ужо восенню 1944 года, заняткі былі адноўлены. Да 1951 года школа заставалася сямігодкай. У 1959 годзе школа перайшла на адзінаццацігадовы тэрмін навучання з вытворчым навучаннем па спецыяльнасці садавод. Для ажыццяўлення задач вытворчага навучання быў закладзены сад плошчай адзін гектар, зроблена цяпліца.

У 1964 годзе пачалося будаўніцтва новага памяшкання школы на 320 вучнёўскіх месцаў. У эксплуатацыю будынак школы быў здадзены 8 кастрычніка 1967 года. У школе з'явіліся лабараторыя і спартыўная зала, была набыта кінаапаратура. У 1968 годзе быў закладзены дэндрапарк, а з 1970 года пачалося паглыбленае вывучэнне трактара. Кабінет па гэтай дысцыпліне быў адзін з лепшых у вобласці. У той час паспяхова працавала вытворчая брыгада, якая у 1975 годзе па выніках даследчай работы заняла першае месца ў вобласці. Школа была ўзнагароджана пераходным Чырвоным Сцягам і грузавым аўтамабілем. У гэтым жа годзе школа стала ўдзельніцай ВДНГ СССР.

У сувязі з перабудовай вёскі ў аграгарадок у 2005 годзе, праведзены капітальны рамонт школы. Заменены вокны, дзверы, новы выгляд набылі сталовая і актавая зала. Пачаў працаваць новы камп'ютарны клас.

Школа – актыўны ўдзельнік раённых, абласных і рэспубліканскіх мерапрыемстваў. Узнагароджана шматлікімі граматамі і дыпломамі. Так, у 2007 годзе за ўдзел у рэспубліканскім конкурсе па добраўпарадкаванні і азеляненні малой Радзімы «Квітней, мой край!» яна ўзнагароджана дыпломам 1-й ступені. У 2011 годзе школа ўзнагароджана дыпломам і кубкам Нацыянальнага алімпійскага камітэта за ІІ месца ў абласным конкурсе малых архітэктурных форм «Алімпійская гісторыя» і пра яе зняты дакументальны фільм.

Адрас: Віцебская вобласць, Докшыцкі раён, аг. Порплішча, вул. Школьная, 2а.

ЛІТАРАТУРА

1. Альшэўская, Т. Вечна юная школа / Т. Альшэўская // Родныя вытокi (Докшыцы). – 2004. – 11 снеж. – С. 2.

2. Канстанцінаў, І. У скарбонку калгаса / І. Канстанцінаў // Настаўніцкая газета. – 1975. – 28 мая. – С. 2.

3. Круковіч, Н. Ах, гэтыя цёплыя сустрэчы! / Н. Круковіч // Родныя вытокi (Докшыцы). – 2008. – 6 лют. – С. 4.

4. Лук'яненка, М. Імкнуцца да дасканаласці / М. Лук'яненка // Родныя вытокі (Докшыцы). – 2009. – 14 кастр. – С. 5.

5. Лук'яненка, М. Яе паважаюць у раёне / М. Лук'яненка // Родныя вытокi (Докшыцы). – 2008. – 8 сак. – С. 2.

6. Сясіцкі, М. Дапамагчы ў выбары шляху / М. Сясіцкі // Вiцебскі рабочы. – 1980. – 16 мая. – С. 3.

7. Фурс, М. Галоўнае – моцная сям'я / М. Фурс // Родныя вытокi (Докшыцы). – 2002. – 13 крас. – С. 2.

8. Чувахова, Т. На зорным шляху выхавання / Т. Чувахова // Родныя вытокi (Докшыцы). – 2003. – 4 кастр.– С. 1.