Дзіцячы сад-сярэдняя школа Тумілавіцкая, ДУА. Докшыцкі раён, в. Тумілавічы

Подробности

Створана 02.05.2019 08:40

Адноўлена 30.03.2020 10:16

У 2017 годзе споўнілася 165 гадоў з таго часу, як упершыню адкрылі свае падручнікі вучні ў в. Тумілавічы. Змянялася краіна, змянялася назва школы, заставалася нязменным толькі яе прызначэнне – даваць веды дзецям. З 1852 года школа размяшчалася ў грамадскім доме. На яе ўтрыманне штогод адпускаліся грошы з дзяржаўнага казначэйства і са збору з дзяржаўных сялян. На пасадзе настаўнікаў у розныя гады працавалі выпускнікі духоўных семінарый Мацвей Сямёнавіч і Сямён Мацвеевіч Балевічы, Іосіф Віктаравіч Чабатароў, выпускнікі Нясвіжскай настаўніцкай семінарыі Ісак Яўсеевіч Шчука, Канстанцін Фёдаравіч Лабоцкі, Кірыл Міронавіч Барысавец, Аляксей Данілавіч Дзянькевіч. Пасля заканчэння Мінскага вучылішча для дзяўчат з 1 лютага 1873 года працавала настаўніцай Алена Антонаўна Хруцкая. У1883/1884 навучальным годзе тут вучылася 35 хлопчыкаў і 5 дзяўчынак. У 1890-х гадах колькасць вучняў стала павялічвацца. У 1891/1892 навучальным годзе быў 41 вучань, у 1896/1897 навучальным годзе – 47 хлопчыкаў і 7 дзяўчынак, у 1898/1899 навучальным годзе – 71 хлопчык і 13 дзяўчынак. Пасля 1917 года пачалася новая старонка ў гісторыі развіцця народнай адукацыі, а з ёй і ў гісторыі Тумілавіцкай школы.

Беларуская школа ў Тумілавічах вядзе свой адлік з 1939 года. У гады Вялікай Айчыннай вайны вёска Тумілавічы была спалена, але, у пасляваенныя гады, адноўлена. Будаўніцтва школы пачалося амаль адразу пасля вызвалення. У 1948 годзе на базе пачатковай школы быў адкрыты пяты клас. Кастрычнік 1949 года – час, калі школа ў в. Тумілавічы перайшла ў новы будынак. Дагэтуль, з 1944 года яна месцілася ў адным пакоі ў суседняй вёскай Стараселле. Адноўленая школа працавала ў тры змены, бо была яшчэ і вячэрняя.

Паступова пачатковая школа была пераўтворана ў сямігадовую, а ў 1951 годзе школа стала сярэдняй. На сродкі калгаса «Праўда» ў 1970 годзе быў пабудаваны кірпічны двухпавярховы будынак новай школы на 192 вучнёўскія месцы, да якога на працягу часу былі ўзведзены –сталовая, інтэрнат, школьная вучэбная майстэрня, аўтаклас, цяпліца. У 1989 годзе зроблены капітальны рамонт будынка. Школа набыла эстэтычны выгляд, прыгажосць і гармонію ў знешнім афармленні. У 1993 годзе ўзнік этнаграфічны куток «Беларуская хатка». У 1995 годзе Тумілавіцкая сярэдняя школа пераўтворана ў школу–сад.

Зараз у школе працуе 20 педагагічных работнікаў.

Адрас: Віцебская вобласць, Докшыцкі раён, в. Тумілавічы, вул. Цэнтральная, 57.

ЛІТАРАТУРА

1. Альшэўская, Т. Млынец – «і швец, і жнец, і на дудзе ігрэц» / Т. Альшэўская // Родныя вытокі (Докшыцы). – 2015. – 21 студз. – С. 6.

2. Альшэўская, Т. У Тумілавіцкай школе / Т. Альшэўская, А. Несцяронак // Родныя вытокі (Докшыцы). – 2018. – 19 мая. – С. 5.

3. Гічанская, Я. Парасткі дабрыні / Я. Гічанская // Родныя вытокі (Докшыцы). – 2017. – 22 крас. – С. 5.

4. Ковель, В. М. Або рабі на «выдатна», або не рабі зусім / В. М. Ковель ; гутарыла А. Несцяронак // Родныя вытокі (Докшыцы). – 2015. – 11 лістап. – С. 1–2.

5. Пастернак, Т. Клякса не в тетради, а на ферме / Т. Пастернак // Витебские вести. – 2015. – 17 марта. – С. 1, 6.

6. Плавінскі, А. Тумілавіцкая школа...ХIХ стагоддзе... / А. Плавінскі, А. Карніловіч // Настаўніцкая газета. – 2012. – 28 чэрв. – С. 13.

7. Саковіч, Т. Магістр на ўсе рукі / Т. Саковіч // Родныя вытокі (Докшыцы). – 2018. – 3 лістап. – С. 5.

8. Салянка, Л. Маленькі востраў вечнага Юнацтва / Л. Салянка // Родныя вытокі (Докшыцы). – 2008. – 1 лістап. – С. 3.

9. Чувахова, Т. Тумілавіцкай школе – 50 / Т. Чувахова // Родныя вытокі (Докшыцы). – 1999. – 27 кастр.– С. 1–2.

10. Чувахова, Т. Школе – 25 / Т. Чувахова ; фота В. Кажамячонка // Родныя вытокі (Докшыцы). – 1996. – 17 лют. – С. 2.

11. Шпакоўская, Г. Тумілавіцкія настаўніцы / Г. Шпакоўская // Народнае слова. – 2002. – 23 лют. – С. 5.

12. Шпакоўская, Г. Ферма корміць, ферма вучыць / Г. Шпакоўская // Народнае слова. – 2001. – 13 снеж. – С. 2.