Дзіцячы сад-сярэдняя школа Краснапольская, ДУА. Расонскі раён, аг. Краснаполле

Подробности: Створана 06.04.2020 08:40; Адноўлена 06.04.2020 10:28

Сучасная назва	ДУА «Краснапольская дзіцячы сад–сярэдняя школа Расонскага раёна»
Тып	дзяржаўная ўстанова адукацыі
Дата заснавання	1918
Месца знаходжання	Віцебская вобласць, Расонскі раён, аг. Краснаполле
Сайт	http://kras-sh.rossoni.edu.by

У в. Краснаполле да Кастрычніцкай рэвалюцыі школы не было. Гэта быў маёнтак пана Гудоўскага з выдатным трох'ярусным паркам на беразе маляўнічага возера.

У 1910 годзе Полацкая павятовая ўправа адкрыла земскія школы ў вёсках Мачулішча, Крашуты, Крывялёва. У школе займаліся тры групы вучняў.

У в. Тродавічы была адкрыта царкоўна-прыходская школа. Настаўніца – Хрылёва Марыя Ісакаўна, якая была ўзнагароджана ў 1936 годзе ордэнам Працоўнага Чырвонага Сцяга.

У 1918 годзе ў доме пана Гудоўскага адкрылася Краснапольская трохкласная школа. Першы дырэктар – Баграц Аляксандр Арсенцьевіч. У 1920 годзе школа згарэла, праіснавала 2 гады.

Гісторыя Краснапольскай школы аднавілася ў 1926 годзе. Гэта была двухкласная пачатковая школа, якая часова размясцілася ў доме селяніна Назара Стральцова, жыхара вёскі Карпіна. Дырэктар школы – настаўнік пачатковых класаў Ялак.

У 1927 годзе навучальная ўстанова размясцілася ў будынку пошты. Былі адкрыты трэці і чацвёртыя класы.

У 1928–1932 гг. дырэктар школы – Ісакаў Георгій Андрэевіч, настаўнік пачатковых класаў – Соф'я Нікіфараўна.

У 1929 годзе школа была пераўтворана ў сямігадовую.

У 1929 годзе з в. Тарчыліха перавезлі двухпавярховы драўляны будынак.

У 1932–1939 гг. школу ўзначальваў Вячэрскі Іван Міхайлавіч.

У 1938 годзе Краснапольская сямігадовая школа пераўтворана ў сярэднюю.

На пачатку Вялікай Айчыннай вайны школу ўзначаліў Раконт Яфім Навумавіч. Краснапольская сярэдняя школа да вайны зрабіла адзін выпуск.

У першыя месяцы пасля вызвалення рэгіёна пачалі аднаўляць сферу адукацыі. У снежні 1943 года ў в. Малыя Асёткі сабраліся на нараду настаўнікі раёна. Вырашаліся пытанні аднаўлення сістэмы народнай адукацыі.

У в. Краснаполле адкрылася пачатковая школа. У 1943–1945 гг. дырэктар – Гайлевіч Яўгенія Вікенцьеўна, у 1945–1948 гг. – настаўнік пачатковых класаў Каралькова Ніна Васільеўна.

У 1948 годзе Краснапольская пачатковая школа была пераўтворана ў сямігадовую. У 1948–1953 гг. дырэктар – ветэран Вялікай Айчыннай вайны, кавалер ордэнаў Айчыннай вайны I і II ступеняў, выдатнік народнай асветы Студзёнка Уладзімір Васільевіч; у 1953–1954 гг. дырэктар – Каваленка Ганна Цімафееўна, у 1954–1959 гг. – Якавіцкая Ганна Паўлаўна.

З 1960 года базавая адукацыя – васьмігадовая. У 1960–1985 гг. дырэктар – Студзёнка Пётр Васільевіч, ветэран Вялікай Айчыннай вайны, кавалер ордэна Славы III ступені, ордэна Айчыннай вайны II ступені, заслужаны настаўнік школ БССР.

У 1974 годзе пачалося будаўніцтва новага сучаснага будынка. У 1975 годзе была адкрыта школа, якая з таго моманту стала сярэдняй.

У 1985–2004 гг. школу ўзначальвала Васільева Таццяна Аляксандраўна, якая вялікую ўвагу надавала добраўпарадкаванню школы і школьнай тэрыторыі.

З 2004 года дырэктар – Сідарэнка Жанна Іванаўна.

У навучальнай установе ажыццяўляецца дашкольная адукацыя. У 2018/2019 навучальным годзе інтэграваную групу ад 4 да 7 гадоў наведвала 14 выхаванцаў, рознаўзроставую групу ад 2 да 4 гадоў – 14 выхаванцаў. Педагагічны калектыў: намеснік дырэктара па выхаваўчай працы, выхавальнікі першай кваліфікацыйнай катэгорыі (4 чалавекі), музычны кіраўнік другой кваліфікацыйнай катэгорыі; настаўнік-дэфектолаг першай кваліфікацыйнай катэгорыі (2 чалавекі).

У 2019/2020 навучальным годзе было сфарміравана 11 агульнаадукацыйных класаў-камплектаў, у якіх навучаецца 131 вучань.

Напаўняльнасць класаў (вучні): першы клас – 12, другі – 16, трэці – 11, чацвёрты – 13, пяты – 20, шосты – 14, сёмы – 10, восьмы – 12, дзявяты – 7, дзясяты – 9, адзінаццаты – 7.

У Краснапольскай дзіцячы сад–сярэдняй школе дзейнічаюць аб'яднанні па інтарэсах: «Канзашы», «Квілінг», «Экалагічная зала», «Юны прававед», «Спадчына».

Дырэктар – Сідарэнка Жанна Іванаўна.

Адрас: Віцебская вобласць, Расонскі раён, аг. Краснаполле, вуліца Ф. Скарыны, д. 15.