Вiцебскi ДБК, ДП

Подробности

Створана 04.12.2023 10:23

Адноўлена 17.07.2024 13:25

Віцебскі домабудаўнічы камбінат быў утвораны 1 лютага 1966 года на базе будаўнічага ўпраўлення № 36 Трэста № 9, завода жалезабетонных вырабаў і БПД. Першым начальнікам ДБК быў прызначаны Генадзь Калінін. У склад Віцебскага ДБК увайшлі завод буйнапанэльнага домабудавання і будаўнічыя патокі па мантажы і аддзелцы дамоў БПД. Першы панэльны дом быў пабудаваны ў 1960 годзе па вуліцы Фрунзэ ў Віцебску са сценавых панэляў (пенабетону). Стварэнне ДБК забяспечыла пераход да новай серыі буйнапанэльных дамоў з удасканаленай планіроўкай кватэр. У 1966 годзе сіламі ДБК у Віцебску ўпершыню ў Беларусі ўзведзены дзевяціпавярховы панэльны дом БПД на 280 кватэр з магазінам на першым паверсе па Смаленскай шашы (цяпер – плошча Перамогі). Вялікая заслуга ў распрацоўцы і ўкараненні дзевяціпавярховых дамоў належыць начальніку канструктарскага аддзела Ігару Краўчанку. Дзякуючы яго намаганням, Віцебскі ДБК першы ў рэспубліцы перайшоў да будаўніцтва жылля павышанай паверхавасці. Асваенне новай серыі і нарошчванне аб'ёмаў вытворчасці дазволіла калектыву Віцебскага ДБК перайсці да забудовы мікрараёнаў г. Віцебска і аказаць дапамогу ў адраджэнні Нечарназем'я Расіі.

У 1968 годзе Віцебскі ДБК увайшоў у склад вытворчага камбіната «Будіндустрыя» і быў падпарадкаваны непасрэдна Міністэрству прамысловага будаўніцтва. З гэтага часу прадпрыемства з'яўляецца генеральным падрадчыкам па забудове жылых комплексаў горада. Камбінат вядзе ўласнымі сіламі 94 % аб'ёму работ, уключаючы ўнутрыквартальныя камунікацыі, устройства падземнай і надземнай часткі будынкаў, іх аддзелку, унутраныя санітарна-тэхнічныя і электрамантажныя работы. Па меры развіцця камбіната расла прадукцыйнасць працы, павялічваўся аб'ём арэнднага жылля. Рост аб'ёмаў вытворчасці дазволіў камбінату ўзводзіць жылыя дамы ў іншых гарадах рэспублікі. За гэтыя гады з вырабаў БПД асвоена будаўніцтва дзіцячых садоў і ясляў. Укаранёна керамзітабетонная панэль, якая дазволіла значна знізіць працазатраты, павысіць цеплатэхніку дома. На сэканомленыя сродкі былі пабудаваны піянерскі лагер «Ліпкі», а таксама база камплектацыі па вуліцы Залатагорскай.

У 1971 годзе камбінат перайшоў на новыя ўмовы планавання і эканамічнага стымулявання. Быў распрацаваны комплексны план арганізацыйна-тэхнічных мерапрыемстваў па ўкараненні дасягненняў навукі і тэхнікі, удасканаленні тэхналогіі вытворчасці, навуковай арганізацыі працы, кіравання і сацыяльнага развіцця камбіната. У дамах БПД быў укаранёны вентыляцыйны дах, узбуйнены нулявы цыкл, абліцоўванне санкабін ажыццяўлялася пры дапамозе керамічнай пліткі, ужывалася афактурыванне сценавых панэляў і інш. Таксама была ўкаранёна пліта перакрыцця з керамзітабетону на ўвесь пакой. Былі сфарміраваны брыгады па ўкараненні новай тэхнікі, у склад якіх, акрамя інжынерна-тэхнічных работнікаў, уваходзілі зваршчык, слесар, станочнік. У 1971–1972 гг. калектыў камбіната за дасягненні ў рэспубліканскім сацыялістычным спаборніцтве ўзнагароджваўся пераходнымі сцягамі Міністэрства прамысловага будаўніцтва БССР і Беларускага рэспубліканскага камітэта прафсаюзаў работнікаў будаўніцтва і прамбудматэрыялаў. У 1973 годзе быў уведзены ў эксплуатацыю мільённы квадратны метр жылля.

З мэтай паляпшэння якасці жылля, укаранення сучасных тэхналогій індустрыяльнага домабудавання ў 1974 годзе пачалася рэканструкцыя завода БПД. Гэта дазволіла практычна змяніць аблічча горада. У першую чаргу ўдасканальваліся архітэктурна-планіровачныя рашэнні забудовы новых мікрараёнаў, павялічвалася паверхавасць аб'ектаў, значна палепшылася планіроўка жылля.

У 1977 годзе Віцебскі домабудаўнічы камбінат увайшоў у склад будаўніча-мантажнага трэста № 28 «Віцебскграмадзянжылбуд». У 1983 годзе ў сувязі з вялікай патрэбай у жыллі, недахопам вытворчых магутнасцей завода БПД і немагчымасцю нарошчвання вытворчасці дамоў БПД на існуючым заводзе сіламі трэста № 28 у раёне п. Білева пачалося будаўніцтва цэха вонкавых сценавых панэляў. Для будаўніцтва завода былі задзейнічаны рэсурсы практычна ўсіх буйных прамысловых прадпрыемстваў горада і вобласці. Аб'ём вытворчасці жалезабетонных канструкцый і бетонных вырабаў з 1991 па 2005 гг. павялічыўся ў 1,5 разы. Пры засваенні магутнасцей завода БПД у Білева не спынялася вытворчасць жалезабетонных вырабаў на старой пляцоўцы.

У 1988 годзе Віцебскі ДБК пераўтварылі ў праектна-прамысловае будаўнічае аб'яднанне індустрыяльнага домабудавання «Віцебскжылбуд» і загадам Міністэрства будаўніцтва БССР вылучылі са складу будаўніча-мантажнага трэста № 28 «Віцебскбуд». Прадпрыемства часткова прыняло на сябе функцыі заказчыка па распрацоўцы праектна-каштарыснай дакументацыі. Спачатку гэта было праектнае ўпраўленне, а з 1992 года ў склад камбіната ўвайшоў філіял праектнага інстытута «Белгіпрабуд». У 1990 годзе на базе ўчастка механізацыі было створана ўпраўленне механізацыі і спецработ, якое ўваходзіць у склад камбіната. Сёння ўпраўленне механізацыі – гэта магутнае аўтатэхнічнае падраздзяленне, якое налічвае больш за 70 адзінак землярыйнай і будаўнічай тэхнікі, 109 транспартных сродкаў, абслугоўвае 14 вежавых кранаў, выконвае вялізны аб'ём землярыйных работ, работ па пракладцы інжынерных камунікацый, правядзенні добраўпарадкавання тэрыторыі аб'ектаў жылля, перавозцы жалезабетонных вырабаў.

У 1994 годзе праектна-прамысловае будаўнічае аб'яднанне індустрыяльнага домабудавання «Віцебскжылбуд» перайменавалі ў аб'яднанне «Віцебскі ДБК». У гэты перыяд калектыў камбіната аказваецца ў складаным фінансавым становішчы з-за адсутнасці заказаў на будаўніцтва жылля. З мэтай захавання калектыву кіраўніцтва завода пачало асвойваць выпуск жалезабетону і бетону для прамысловага і грамадзянскага будаўніцтва. Былі заключаны дагаворы на пастаўку жалезабетонных вырабаў у Расію – Смаленск і Маскву. Асвоены выпуск тратуарнай пліткі, бардзюрнага каменю, жалезабетонных кольцаў, таварнага бетону. З мэтай атрымання заказаў на будаўніцтва аб'ектаў сацыяльнага прызначэння і жылых дамоў у Расіі Віцебскі ДБК выступае ініцыятарам прыняцця пагаднення паміж урадамі Беларусі і Расійскай Федэрацыі на будаўніцтва аб'ектаў на тэрыторыі Расіі. У гэтыя гады камбінат узводзіць будынкі і збудаванні прамысловага і сацыяльнага прызначэння, жылыя дамы ў г. Белаярскі Ханты-Мансійскай аўтаномнай акругі, Валгарэчанску, Маскве, Смаленску, Пскове, Кастраме. У сувязі з аддаленасцю аб'ектаў, якія будуюцца ў Расійскай Федэрацыі, у 2000–2003 гг. ствараецца Белаярскае будаўнічае ўпраўленне. Ва ўмовах Сібіры, выкарыстоўваючы вахтавы метад, калектыў ДБК правёў рэканструкцыю базы адпачынку «Севяранка», друкарні, лыжнай базы, пабудаваў і здаў 48-кватэрны дом з мансардай, 50-кватэрны дом БПД з панэляў Омскага завода, педыятрычны корпус і іншыя аб'екты сацыяльнага прызначэння.

У 2000 годзе аб'яднанне «Віцебскі ДБК» перайменавана ў РУП «Віцебскі ДБК», у 2003 годзе ў яго склад увайшло ААТ «Трэст № 28». У 2008 годзе пачалося поўнамаштабнае тэхнічнае пераўзбраенне завода БПД без спынення вытворчасці. У 2017 годзе РУП «Віцебскі ДБК» перайменавана ў дзяржаўнае прадпрыемства «Віцебскі ДБК».

Домабудаўнікі ўносілі і ўносяць свой уклад у развіццё сельскай гаспадаркі. У 2004 годзе камбінатам асвоена вытворчасць лёгкіх панэльных дамоў па фінскай тэхналогіі і за гэты час у сельскіх населеных пунктах пабудавана 65 жылых аб'ектаў сядзібнага тыпу. Акрамя будаўніцтва жылля, камбінат мае вопыт рэканструкцыі сацыяльна значных аб'ектаў. Так, у 2007 годзе ў Віцебску была праведзена рэканструкцыя пляцоўкі Летняга амфітэатра для правядзення Міжнароднага фестывалю мастацтваў «Славянскі базар у Віцебску». Прадпрыемства паспяхова вырашыла задачы па рэканструкцыі вагоннага дэпо, аўтавакзала і будаўніцтве новага піўзавода.

Сёння дзяржаўнае прадпрыемства «Віцебскі ДБК» – гэта шматпрофільнае прадпрыемства, якое паспяхова вырашае задачы вытворчасці жалезабетонных вырабаў і канструкцый і будоўлі жылля. Завод БПД выпускае шырокі асартымент высокаякасных жалезабетонных вырабаў і канструкцый для мантажу жылых дамоў БПД і індывідуальнага домабудавання, а таксама плітку тратуарную, бардзюры, таварны бетон і раствор. У склад Віцебскага ДБК уваходзіць дапаможная вытворчасць па перапрацоўцы пясчана-гравійнай сумесі «Крулеўшчызна».

За ўсю гісторыю свайго існавання прадпрыемства выканала забудову большасці мікрараёнаў Віцебска. Ажыццяўляла будаўніцтва ў Мінску, Полацку, Оршы, Браславе, а таксама ў малых гарадах Віцебскай вобласці. За ўсе гады прадпрыемства пабудавала звыш 4 млн. м2 жылля.

У розныя гады Віцебскі ДБК узнагароджваўся дыпломамі за высокія дасягненні ў сваёй працы: «За дасягненні ў будаўнічай галіне Рэспублікі Беларусь» (2005, 2006, 2007, 2009), «Лепшы будаўнічы прадукт года» (2014, 2015). Прадпрыемства было занесена на Рэспубліканскую Дошку Гонару (2010) і Дошку Гонару г. Віцебска (2008, 2010, 2016).

Работнікі ДП «Віцебскі ДБК» удзяляюць шмат увагі спорту. Каманда камбіната заўжды прымае ўдзел ва ўсіх спартыўных мерапрыемствах, якія праходзяць у краіне, вобласці і горадзе. Для дзяцей работнікаў прадпрыемства дзейнічае дзіцячы аздараўленчы лагер «Ліпкі» ў Віцебскім раёне.

Адрас: Віцебская вобласць, горад Віцебск, Маскоўскі праспект, 55.

E-mail: Этот адрес электронной почты защищен от спам-ботов. У вас должен быть включен JavaScript для просмотра.

ЛІТАРАТУРА

1. Алимова, Е. Витебский ДСК: сделано железобетонно / Е. Алимова // СБ. Беларусь сегодня. – 2023. – 2 авг. – С. 13.

2. Витебский ДСК: летопись качества и успеха // Витебские вести. – 2024. – 28 июня. – С. 15.

3. Государственное предприятие «Витебский ДСК»: все для эффективного и безопасного труда / подгот. А. А. Тихонов // Охрана труда и социальная защита. – 2023. – № 10. – С. 4–9.

4. Домостроительный комбинат // Витебск : энциклопедический справочник / редкол.: И. П. Шамякин [и др.]. – Минск : БелСЭ им. П. Бровки, 1988. – С. 172.

5. Дубовиков, А. ДСК присматривается к роботам / А. Дубовиков ; [беседовал] С. Антонов // Витебские вести. – 2020. – 5 дек. – С. 4.

6. Кочетов, С. В первом ряду – новинка ДСК / С. Кочетов // Віцьбічы = Витьбичи. – 2023. – 5 окт. – С. 3.

7. Кочетов, С. Стройка начинается с охраны труда / С. Кочетов // Віцьбічы = Витьбичи. – 2023. – 30 сент. – С. 11.

8. У кого лучшие изделия из железобетона / подгот. В. Сеньков // Віцьбічы = Витьбичи. – 2022. – 1 дек. – С. 3.

9. Шайтар, В. И. Мы этот город строили с тобою...: к 50-летию РУП «Витебский ДСК» / В. И. Шайтар. – Минск : Колорград, 2016. – 194, [1] с.

СПАСЫЛКІ

 История компании

 Республиканское унитарное предприятие «Витебский ДСК»