Даламіт, ААТ. г. Віцебск
- Подробности
- Створана 17.05.2017 12:23
- Адноўлена 14.12.2023 10:27
| Сучасная назва | ААТ «Даламіт» |
| Тып | адкрытае акцыянернае таварыства |
| Дата заснавання | 1931 |
| Месца знаходжання | Віцебская вобласць, г. Віцебск |
| Галіна | прамысловасць будаўнічых матэрыялаў |
| Сайт | https://dolomit.by/by/ |
ААТ «Даламіт» – прадпрыемства па вытворчасці пылападобных матэрыялаў і даламітавага шчэбню. Створана ў 1931 годзе ў гарадскім пасёлку Руба Віцебскага раёна (з 1999 г. – у межах Віцебска) як вапнавы завод. З пускам першай шахтавай печы магутнасцю 10 тыс. тон у год вапны быў закладзены падмурак прамысловай вытворчасці прадукцыі, якая мела важнае народна-гаспадарчае значэнне і паспрыяла развіццю пасёлка Руба. З таго часу штогод пачалі нарошчвацца вытворчыя магутнасці. У 1936 годзе ўведзена ў эксплуатацыю другая шахтавая печ магутнасцю 12 тыс. тон у год. Геолагаразведачныя работы, праведзеныя ў 1930 і 1934 гг., пацвердзілі значныя залежы даламітавага вапняку і перспектыўнасць развіцця завода. У сярэдзіне 30-х гадоў у кар'еры Руба з'явіўся першы паравы экскаватар, які рухаўся па спецыяльна ўладкованай у кар'еры чыгунцы і рабіў раскрыўныя работы. Вытворчасць вапны да 1941 года ўзрасла на заводзе ў дзясяткі разоў.
У гады Вялікай Айчыннай вайны завод быў поўнасцю разбураны. У 1948 годзе былі адноўлены і ўведзены ў эксплуатацыю шахтавыя печы. У 1952–1953 гг. у Рубе на правым беразе ракі Заходняя Дзвіна былі пабудаваны яшчэ тры шахтавыя печы прадукцыйнасцю 10 тыс. тон кожная. У сувязі з тым, што асноўнай сыравіннай базай для завода ў Рубе з'яўляўся кар'ер на левым беразе ракі, а печы былі пабудаваны на правым беразе, падавалі вапняк з кар'ера на завод з дапамогай паветранай канатнай дарогі. Гэтая дарога дзейнічала да 1977 года. З уводам моста праз раку дарога была дэмантавана, а падвоз сыравіны пачаў ажыццяўляцца аўтатранспартам. У 1953 годзе з мэтай павышэння ўзроўню механізацыі тэхналагічнага працэсу, павелічэння прадукцыйнасці працы і аб'ёмаў выпуску, на вапнавым заводзе ў Рубе быў пабудаваны драбільна-сартавальны цэх, адкуль ужо падрыхтаваная сыравіна патрэбнай фракцыі падавалася на вапнавыя печы. У 50-я гады ідзе хуткі працэс нарошчвання тэхнічнай аснашчанасці вытворчасці. У кар'ерах з'яўляюцца дызельныя і электрычныя экскаватары, аўтамабілі-самазвалы.
У пачатку 60-х гадоў беларускія навукоўцы-аграномы выпрацоўваюць формы і метады барацьбы па зніжэнні ступені кіслотнасці падзольных глеб Беларусі. Найбольш эфектыўным сродкам з'явіўся даламітавы вапняк, здроблены да фракцыі менш за адзін міліметр. Даламітавая крошка стала каштоўным кампанентам для раскіслення глебы і разам з іншымі мінеральнымі ўгнаеннямі заняла дастойнае месца ў беларускай аграхіміі. У 1967 годзе была пабудавана і ўведзена ў эксплуатацыю першая чарга завода па вытворчасці пылападобнай вапняковай мукі ў Рубе. Прадпрыемства было перайменавана ў камбінат вапнавых матэрыялаў. У 1971 годзе ўведзена 2-я чарга гэтага завода.
У пачатку 70-х гадоў пачалося інтэнсіўнае будаўніцтва кар'ера «Гралёва», сыравінная база патрабавала значнага павелічэння па аб'ёмах здабычы сыравіны. У Рубе было пачата будаўніцтва 3-га цэха па вытворчасці даламітавай мукі. У снежні 1977 года здадзена ў эксплуатацыю дзве тэхналагічныя лініі, а роўна праз год яшчэ тры тэхналагічныя лініі па вытворчасці вапняковай мукі, агульнай магутнасцю 2200 тыс. тон у год. У маі 1978 года Віцебскі камбінат вапнавых матэрыялаў быў перайменаваны ў ВПА «Даламіт».
У 1970–1980 гг. нараўне з развіццём вытворчасці і вялікім прытокам працоўнай сілы значна ўзрасло будаўніцтва жылля і аб'ектаў сацыяльнай сферы. У пасёлку Руба з'явіліся прыгожыя шматпавярховыя жылыя дамы, дзіцячыя сады, дом быту, вытворча-бытавыя карпусы. Ужо ў 1975 годзе ва ўтульным месцы на беразе ракі Заходняя Дзвіна пачаў функцыянаваць свой санаторый-прафілакторый. У 1979 годзе пачата будаўніцтва Палаца культуры на 500 месцаў і інжынерна-лабараторнага корпуса, завершана будаўніцтва здраўпункта, адміністрацыйна-бытавога будынка кар'еракіравання і рамонтнай зоны горнай тэхнікі. У цэхах і службах аб'яднання працаваў амаль двухтысячны працоўны калектыў.
З сакавіка 1995 года ВПА «Даламіт» пераўтворана ў ААТ «Даламіт». Асноўную вытворчую базу складаюць 11 незалежных тэхналагічных ліній. З 2000 года прадпрыемства пераведзена на спальванне прыроднага газу, што дало магчымасць скараціць выдаткі вытворчасці, палепшыць экалагічную абстаноўку на прадпрыемстве, адкрыць перспектывы ўкаранення газатурбінных установак для выпрацоўкі ўласнай электраэнергіі і выкарыстання адпрацаваных газаў у якасці сушыльнага агента ў тэхналогіі вытворчасці даламітавай мукі.
Сёння ААТ «Даламіт» – лідар у Еўропе па здабычы даламітавай сыравіны і вытворчасці на яе аснове розных відаў прадукцыі. Прадпрыемства актыўна развіваецца. За апошнія дзесяць гадоў была пабудавана лінія па вытворчасці шклянога парашку, мадэрнізаваны рад вытворчасцяў, заменены парк велікагрузных аўтамабіляў. У кар'еры «Гралёва» з'явілася новая тэхніка, палепшыліся ўмовы працы. Прадпрыемства мае ўласную вытворчую лабараторыю, якая ажыццяўляе ўваходны кантроль, кантроль якасці паўфабрыкатаў і гатовай прадукцыі, кантроль за санітарным станам на працоўных месцах, прампляцоўцы і пасёлку. Увесь тэхналагічны працэс аўтаматызаваны. ААТ «Даламіт» экспартуе сваю прадукцыю ў Расію, Украіну, краіны Балтыі.
Адрас: Віцебская вобласць, горад Віцебск, вуліца Цэнтральная, д. 23.
E-mail: Этот адрес электронной почты защищен от спам-ботов. У вас должен быть включен JavaScript для просмотра.
        
|
ЛІТАРАТУРА
1. Алимова, Е. История есть, но такого в ней еще не было / Е. Алимова // Сельская газета. – 2021. – 2 нояб. – С. 3.
2. Башун, Е. «Доломит» успешно пишет свою историю / Е. Башун // Витебские вести. – 2021. – 29 окт. – С. 12–13.
3. Віцебскае акцыянернае таварыства «Даламіт» // Памяць: Віцебск : гісторыка-дакументальныя хронікі гарадоў і раёнаў Беларусі : у 2 кн. / рэдкал.: Г. П. Пашкоў [і інш.] ; склад. А. І. Мацяюн ; мастак Э. Э. Жакевіч. – Мінск : БелЭн, 2003. – Кн. 2. – С. 454.
4. «Доломит» // Витебск : энциклопедический справочник / редкол.: И. П. Шамякин [и др.]. – Минск : БелСЭ им. П. Бровки, 1988. – С. 168.
5. «Доломит» // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2010. – Т. 2 : Витебская область : в 2 кн. – Кн. 1. – С. 382–383.
6. Открытое акционерное общество «Доломит» / авт. текста: Е. И. Агеева, М. В. Барановская, Л. В. Савченко ; фото: В. В. Рожков. – Минск : Колорград, 2021. – 110, [1] с., [2] л. ил.
7. Пастернак, Т. От шахтной печи к масштабному производству: 90-летие со дня образования своего предприятия отпраздновали работники ОАО «Доломит» / Т. Пастернак // Витебские вести. – 2021. – 28 дек. – С. 3.
СПАСЫЛКІ
Отдел кадров. Строительство известкового завода «Доломит» (1966 г.)
