Капліца. Полацкі раён

Подробности

Створана 04.07.2019 15:23

Адноўлена 22.07.2019 09:52

Капліца знаходзіцца на могілках паміж вёскамі Мышчана, Ліцвінава і Бяздзедавічы. Пабудавана ў 1910 годзе з бутавага каменю і цэглы як родавая пахавальня ўладальнікаў маёнтка Корсакаў. Знаходзілася ў паўзруйнаваным стане, у 1990-я гг. была адрамантавана, прыпісана да Спаса-Праабражэнскай царквы ў в. Шпакоўшчына. 

Помнік архітэктуры неарускага стылю. Прамавугольны ў плане аб'ём завершаны 8-гранным барабанам, шацёр якога завершаны макаўкай і дэкарыраваны ў аснаванні какошнікамі. Уваход вырашаны масіўным шатровым рундуком з магутнымі арачнымі праёмамі на слупах-дыньках. Фасады апяразаны какошнікавым і зубчастым парапетамі, прафіляваным карнізам з гарадковымі фрызамі і разнымі металічнымі падзорамі. Насычанае каларыстычнае вырашэнне дасягнута спалучэннем паліхромнай бутавай муроўкі сцен і чырвонацаглянай муроўкі архітэктурнага дэкору: пластычныя ліштвы лучковых аконных праёмаў, вуглавыя лапаткі з «патопленымі» калонкамі, рамбічныя плакеткі, накладныя крыжы.

У інтэр'еры апсіду вылучаў высокамастацкі бела-керамічны іканастас у стылі неаракако (разбіты). Падалтарнай часткай была крыпта-пахавальня ўладальнікаў маёнтка (не захавалася).

Непадалёку ад храма знаходзіцца сядзіба памешчыка Віцебскай губерніі, былога Яраслаўскага губернатара Аляксандра Аляксандравіча Рымскага-Корсакава. 

ЛІТАРАТУРА

1. Капліца // Праваслаўныя храмы Беларусі : энцыклапедычны даведнік / А. М. Кулагін ; маст.: З. Э. Герасімовіч, У. П. Свентахоўскі. – Мінск : БелЭн, 2007. – С. 62–63.

2. Карасёў, В. У чаканні дапамогі / В. Карасёў // Полацкі веснік. – 2008. – 21 кастр. – С. 7.

3. Петров, А. Церковь... хотели купить американцы / А. Петров // Віцебскі рабочы. – 2009. – 30 июля. – С. 4.

4. Пукшанскі, А. Трэба выратоўваць унікальную шатровую царкву / А. Пукшанскі // Звязда. – 2009. – 22 ліп. – С. 3.

5. Царква // Праваслаўныя храмы на Беларусі : энцыклапедычны даведнік / А. М. Кулагін ; маст. І. І. Бокі. – Мінск : БелЭн, 2001. – С. 30.

6. Царква // Збор помнікаў гісторыі і культуры Беларусі. Віцебская вобласць / рэдкал.: С. В. Марцэлеў [і інш.]. – Мінск : БелЭн імя П. Броўкі, 1985. – С. 363.