Парк партызанскай славы імя Міная Шмырова. Віцебск, г.

Подробности

Створана 11.04.2023 13:14

Адноўлена 11.04.2023 13:14

Парк партызанскай славы імя Міная Шмырова (ранейшая назва – парк імя Леніна) размешчаны ў цэнтры горада на высокім левым беразе Заходняй Дзвіны на тэрыторыі былога Узгорскага замка. Межамі асноўнай часткі парку з'яўляюцца плошча Леніна, вуліца Урыцкага, Заходняя Дзвіна і вуліца Чэхава.

Парк закладзены ў канцы XVIII ст., а ў сярэдзіне XIX ст. ён функцыянаваў як грамадскі сад. У 1924 годзе перайменаваны ў парк імя Леніна. У парку высаджана каля 800 дрэў і кустоў. Сярод іх: ліпа, таполя канадская і пірамідальная, ясень звычайны, клёны вастралісты і чырвоны, бяроза пухнатая, елка блакітная, акацыя белая і іншыя. Пераважная планіроўка парку – рэгулярная. Плошча – звыш 7 га.

У 1957 годзе на месцы сучаснага парку адкрыты парк культуры і адпачынку імя У. І. Леніна. Паркавы комплекс кампазіцыйна складаўся з трох частак: сад Леніна, партызанскі сквер і сквер Успенка (сквер герояў Айчыннай вайны 1812 года). Часткі парку злучаліся алеямі і вуліцай Путна. Зараз алея з кветак злучае цэнтр партызанскага сквера з плошчай Леніна. Тут знаходзіцца музей М. П. Шмырова, побач з будынкам музея бюст Героя Савецкага Саюза, экспазіцыя артылерыйскай зброі, дубовая алея, пасаджаная былымі партызанамі. У частцы парку ад плошчы Леніна да музея Шмырова зараз размешчана абласная Дошка Гонару прадпрыемстваў і арганізацый.

У студзені 2008 года ўчастак парку паміж вуліцай Суворава і Заходняй Дзвіной быў названы «скверам 70-годдзя ўтварэння Віцебскай вобласці», пазней на алеі быў усталяваны валун з памятнай дошкай.

У 2010 годзе, падчас святкавання 66-й гадавіны вызвалення Віцебска ад нямецка-фашысцкіх захопнікаў, парк быў названы ў гонар Міная Піліпавіча Шмырова, аднаго з арганізатараў партызанскага руху ў Віцебскай вобласці, і ўрачыста адкрыты. Наведвальнікам была прадстаўлена і новая экспазіцыйная рэкрэацыя пад адкрытым небам, якая ўяўляе сабой рэканструкцыю партызанскай стаянкі часоў Вялікай Айчыннай вайны. У парку таксама знаходзяцца іншыя атрыбуты партызанскага лагера: акоп, чыгуначная платформа ўзору 1940-х гадоў, будан, вогнішча і колы.

У асноўнай частцы парку ў 2011 годзе была праведзена рэканструкцыя і быў усталяваны памятны знак «Дзецям вайны» (скульптар В. Магучы).

ЛІТАРАТУРА

1. Константинович, А. Большое начинается с малого / А. Константинович // Витебские вести. – 2022. – 20 сент. – С. 6.

2. Леонькина, А. Вклад в благоустройство города / А. Леонькина // Віцьбічы = Витьбичи. – 2022. – 20 сент. – С. 4–5.

3. Об утраченном детстве / подгот. Ю. Прищепа // Гарадоцкі веснік. – 2020. – 30 кастр. – С. 4.

4. Парк имени Ленина // Витебск : энциклопедический справочник / редкол.: И. П. Шамякин (гл. ред.) [и др.]. – Минск : БелСЭ, 1988. – С. 276–277.

5. Пастернак, Т. Партизанская стоянка в центре Витебска / Т. Пастернак // Народнае слова. – 2010. – 17 чэрв. – С. 9.

6. Чабатарова, Т. У Віцебску адкрыўся парк Партызанскай славы / Т. Чабатарова // Вольнае Глыбокае. – 2010. – 1 ліп. – С. 2.

7. Яковлева, С. Деревья героев / С. Яковлева // Віцьбічы = Витьбичи. – 2022. – 1 нояб. – С. 4.