Агульны стан эканомікі. Шаркаўшчынскі раён
- Подробности
- Створана 29.03.2017 08:40
- Адноўлена 09.03.2020 08:27
Аснова эканомікі Шаркаўшчынскага раёна – сельская вытворчасць.
Аграпрамысловы комплекс прадстаўлены 8 сельскагаспадарчымі вытворчымі кааператывамі і 13 сялянскімі (фермерскімі) гаспадаркамі.
Прадпрыемствы сельскай гаспадаркі:
ААТ «Буеўшчына»;
ААТ «Ельня-Агра»;
ААТ «Жвіранка»;
ААТ «Княж»;
ААТ «Шаркаўшчынскі агратэхсэрвіс»;
КУП (СГ) П імя Маркава.
Агульная плошча сельскагаспадарчых угоддзяў складае 60,0 тыс. га, у тым ліку 39,2 тыс. га – раллі.
На 1 студзеня 2018 года ў сельскагаспадарчых арганізацыях раёна (без уліку фермерскіх і асабістых гаспадарак насельніцтва) змяшчалася 25,2 тыс. галоў буйной рагатай жывёлы (у тым ліку 9,2 тыс. кароў) і 11,9 тыс. свіней.
Асноўнай прадукцыяй аграпрамысловага комплексу з'яўляюцца мяса, малако, збожжа, лён, бульба, кармавыя культуры.
За апошнія гады ў гаспадарках Шаркаўшчынскага раёна ўведзены ў эксплуатацыю дзве новыя малочнатаварныя фермы з даільнымі заламі: «Пашкі» ААТ «Шаркаўшчынскі агратэхсэрвіс» і «Варонка» ААТ «Буеўшчына»; пускавыя комплексы на малочнатаварных фермах «Зорка» ААТ «Ельня-Агра» і «Каўшэлева» ААТ «Жвіранка». Працягваецца будаўніцтва малочнатаварнай фермы «Лонскія» ААТ «Буеўшчына».
Тэхнічнае абслугоўванне сельскагаспадарчых арганізацый ажыццяўляе ААТ «Шаркаўшчынскі агратэхсэрвіс».
Прамысловасць Шаркаўшчынскага раёна прадстаўлена «Шаркаўшчынскім кансервавым заводам», філіялам ПУП «Полацкая ўніверсальная база». Размешчаны ў г. п. Шаркаўшчына.
Жыллёва-камунальныя паслугі ў раёне аказвае УКП ЖКГ Шаркаўшчынскага раёна, асноўным відам дзейнасці якога з'яўляецца цеплаэнергетыка. На балансе прадпрыемства знаходзіцца 14 дзеючых кацельняў, 8 з іх – у сельскай мясцовасці.
У 2013 г. створана новае прыватнае будаўніча-гандлёвае ўнітарнае прадпрыемства «СтройГрадЭкспо» па аказанні будаўнічых паслуг, дзе працуюць 20 чалавек.
З 2017 г. у сферы дрэваапрацоўкі працуе новае прадпрыемства – ТАА «Дрэў-Інвест». На прадпрыемстве створаны 22 працоўныя месцы.
У Шаркаўшчынскім раёне дзейнічае вытворча-гандлёвае ўнітарнае прадпрыемства «Камплект-М». Там працуе 50 чалавек. Прадпрыемства вырабляе драўляныя паддоны і пастаўляе іх на экспарт у Германію, Бельгію, Літву, Латвію, Нідэрланды.
КУП «Шаркаўшчынскі камбінат бытавога абслугоўвання» аказвае 17 відаў бытавых паслуг насельніцтву, з якіх 11 з'яўляюцца сацыяльна значнымі.
Сярэдняя колькасць работнікаў, занятых на прамысловых прадпрыемствах, складае 274 чалавекі або 4,2 % ад занятых у народнай гаспадарцы раёна.
На тэрыторыі Шаркаўшчынскага раёна налічваюцца 283 суб'екты малога і сярэдняга бізнесу, з іх 73 – юрыдычныя асобы і 210 – індывідуальныя прадпрымальнікі.
Паслугі паштовай сувязі аказваюць 20 сельскіх аддзяленняў сувязі i ўчастак апрацоўкі пошты ў райцэнтры.
Паслугі электрасувязі ў раёне аказваюць раённы вузел электрасувязі і Германавіцкі лінейна-тэхнічны ўчастак.
Транспартная сетка ў Шаркаўшчынскім раёне прадстаўлена чыгуначным і аўтамабільным транспартам. Праз тэрыторыю г. п. Шаркаўшчына праходзіць чыгуначная лінія «Круляўшчызна – Друя».
Транспартнае абслугоўванне насельніцтва ажыццяўляе Шаркаўшчынскі філіял аўтатранспартнага прадпрыемства № 16 г. Глыбокае.
Стабільна працуе дарожнае прадпрыемства – філіял ДБУ № 26 ААТ «Дарожна-будаўнічы трэст № 1 г. Віцебска».
ЛІТАРАТУРА
1. Адметнай даце – новыя поспехі і дасягненні // Кліч Радзімы (Шаркаўшчына). – 2010. – 26 лют. – С. 2, 5.
2. Ананич, Е. В ОАО «Ельня-Агро» подвели итоги работы / Е. Ананич // Кліч Радзімы (Шаркаўшчына). – 2018. – 28 крас. – С. 2.
3. Берникович, Д. За каждым решением стоит расчет / Д. Берникович // Витебские вести. – 2016. – 1 дек. – С. 4.
4. Каминский, О. Что за земля, на которой нет сада / О. Каминский // Белорусская нива. – 2012. – 26 июля. – С. 5.
5. Морхат, М. В. Працаваць вынікова і мэтанакіравана / М. В. Морхат ; гутарыў Э. Корсак // Кліч Радзімы (Шаркаўшчына). – 2012. – 21 студз. – С. 1–2.
6. Райчонак, С. Эканоміка раёна / С. Райчонак // Кліч Радзімы (Шаркаўшчына). – 2018. – 30 чэрв. – С. 3.
7. Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2010. – Т. 2 : Витебская область : в 2 кн. – Кн. 1. – 536 с. : ил.
8. Сауліч, У. Няхай людзі ведаюць / У. Сауліч // Віцебскі рабочы. – 2011. – 13 авг. – С. 6.
СПАСЫЛКІ
