Лепельскае возера. Лепельскі раён

Подробности

Створана 27.11.2017 10:37

Адноўлена 16.01.2018 10:05

Лепельскае возера (Лепель), у Лепельскім раёне Віцебскай вобласці. Плошча 10,18 км². Найбольшая глыбіня 33,7 м. Даўжыня 7,57 км. Найбольшая шырыня 2,03 км. Даўжыня берагавой лініі 39,65 км. Аб'ём вады 74,67 млн. м³. Плошча вадазбору 1279,6 км².

У басейне ракі Ула (выцякае з возера), на паўночнай ускраіне г. Лепель. Катлавіна падзяляецца на 3 часткі, якія маюць мясцовыя назвы: паўночная – Кусцінскае возера (глыбіня 23 м), паўднёвая – Гарадское возера (19,5 м), усходняя – Белае возера (33,7 м). Схілы катлавіны на поўдні і паўднёвым усходзе і месцамі на 3 вышынёй да 25 м, з асыпкамі і апоўзнямі, месцамі задзернаваныя; астатнія вышынёй каля 10 м, пад пасевамі, на ўсходзе пад лесам. Шмат заліваў і паўастравоў. Берагі нізкія, задзернаваныя, месцамі пад хмызняком, на поўдні і паўднёвым усходзе зліваюцца са схіламі, участкамі абразійныя. У 1958, калі на р. Ула была пабудавана Лепельская ГЭС, узровень возера падняты прыкладна на 4 м, што істотна змяніла яго гідралагічны рэжым і канфігурацыю берагавой лініі. Падводная частка катлавіны ўскладнена шматлікімі мелямі на месцы былых астравоў і ўпадзінамі. Дно да глыбіні 7–7,5 м выслана пяскамі, глыбей – сапрапелямі. Прыбярэжная расліннасць утварае паласу шырынёй ад 3 м да 300 м, зрэджаную каля абразійных берагоў. Упадаюць р. Эса (на поўдні) і р. Зеха (на поўначы). У возеры вельмі багаты жывёльны свет. Выкарыстоўваецца для адпачынку і ў аздараўленчых мэтах (на беразе база адпачынку, пансіянат «ЛОДЭ»).
 

ЛІТАРАТУРА

1. «Над прадоннем былінных азёр...» // Літаратура і мастацтва. – 2016. – 29 ліп. – С. 1, 4.

2. Лепельскае возера // Блакітны скарб Беларусі : энцыклапедыя / рэдкал.: Г. П. Пашкоў [і інш.] ; маст.: Ю. А. Тарэеў, У. І. Цярэнцьеў. – Мінск : БелЭн, 2007. – С. 248.

3. Лепельскае возера // Геаграфія Беларусі : энцыклапедычны даведнік / рэдкал.: Л. В. Казлоўская [і інш.]. – Мінск : БелЭн, 1992. – С. 129. – (Энцыклапедычная бібліятэка школьніка).

4. Лепельское озеро // Регионы Беларуси : энциклопедия : в 7 т. / редкол.: Т. В. Белова [и др.]. – Минск : БелЭн імя П. Броўкі, 2011. – Т. 2 : Витебская область : в 2 кн. – Кн. 2. – С. 54.

5. Лепельское озеро // Туристская энциклопедия Беларуси / редкол.: Г. П. Пашков [и др.] ; под общ. ред И. И. Пирожника ; сост.: Л. В. Ловчая, Т. И. Жуковская. – Минск : БелЭн, 2007. – С. 284.

6. Лепельское озеро // Туристские регионы Беларуси / редкол. Г. П. Пашков [и др.] ; под общ. ред. И. И. Пирожника ; сост. Л. В. Ловчая. – Минск : БелЭн імя П. Броўкі, 2008. – С. 156 : ил.

7. Телятко, Е. И удача в награду / Е. Телятко // Витебские вести. – 2015. – 24 февр. – С. 8.

8. Хаткевіч, В. Азёрныя далягляды / В. Хаткевіч // Лепельскі край. – 2006. – 10 мая. – С. 3.

9. Шушкевіч, У. Падарожжа вакол Лепельскага возера / У. Шушкевіч. – Лепель : Лепельская типография, 2001. – 32 с.