Дата заснавання: 05.07.1941

Месца дзеяння:

Віцебская вобл.: Суражскі р-н , Гарадоцкі р-н, Віцебскі р-н 

Расія, Смаленская вобл., Веліжскі р-н

Расія, Пскоўская вобл., Усвяцкі р-н

Камандзіры атрада:

Шмыроў Мінай Піліпавіч  (ліпень 1941 – красавік 1942) 

Курмялёў Рыгор Сцяпанавіч  (красавік 1942 – жнівень 1942, загінуў) 

Новікаў Фама Фёдаравіч  (жнівень 1942 – май 1943, загінуў) 

Лёвін Дзмітрый Пятровіч  (май 1943 – ліпень 1943, в. а., загінуў) 

Папкоў Пётр Канстанцінавіч  (ліпень 1943 – кастрычнік 1943) 

Камісары:

Шкрэда Рычард Уладзіслававіч  (студзень 1942 – красавік 1942) 

Новікаў Фама Фёдаравіч  (красавік 1942 – жнівень 1942) 

Лёвін Дзмітрый Пятровіч  (жнівень 1942 – ліпень 1943) 

Цуранаў Іван Пятровіч  (ліпень 1943 – верасень 1943) 

Шаракоў Васіль Яўсеевіч  (верасень 1943 – кастрычнік 1943) 

Начальнікі штаба: Голубеў Павел Мікалаевіч  (ліпень 1941 – снежань 1941, загінуў) 

Захараў Якаў Захаравіч  (сакавік 1942 – красавік 1942) 

Бурмістраў Міхаіл Яфімавіч  (красавік 1942 – сакавік 1943) 

Пагарэлаў Аляксей Аляксеевіч  (сакавік 1943 – май 1943) 

Арлоў Еўдакім Сяргеевіч  (май 1943 – ліпень 1943) 

Мар’янаў Пётр Рыгоравіч  (жнівень 1943 – кастрычнік 1943) 

Створаны 5 ліпеня 1941 г. з рабочых Пудацкай кардоннай фабрыкі. 14 ліпеня прыступіў да баявых дзеянняў. У канцы 1941 г. рассеяны карнікамі на невялікія групы, частка якіх выйшла за лінію фронту, а частка засталася ў варожым тыле. У лютым 1942 г. створаны зноў.

У сакавіку ў атрад М. П. Шмырова ўвайшоў атрад Я. З. Захарава (створаны ў снежні 1941 г. у в. Логава Веліжскага раёна Смаленскай вобласці, камандзір Я. З. Захараў, нач. штаба М. Я. Бурмістраў). Пасля ўваходу ў брыгаду атрад Р. С. Курмялёва (пасля гібелі Р. С. Курмялёва атраду нададзена яго імя) часам называўся па прозвішчы камандзіраў атрада Ф. Ф. Новікава, Д. П. Лёвіна, П.К. Папкова. У маі 1942 г. з атрада вылучана група С. Т. Воранава, на базе якой створаны атрад, разгорнуты ў партызанскую брыгаду імя М. І. Кутузава Віцебскай вобласці. У ліпені ў атрад увайшла група А. І. Хатулёва (80 партызан), вылучаная з атрада Д. Ф. Райцава для фарміравання атрада Батанічнага. У верасні пры часовым выхадзе атрада ў савецкі тыл, калі гітлераўцы «закрылі» «Віцебскія вароты», з груп, якія засталіся ў варожым тыле, створаны атрад Д. Я. Воранава (пазней А. П. Дзіка). У ліпені 1943 г. у час карнай аперацыі штаб, 2-я і 3-я роты атрада (161 партызан) выйшлі ў савецкі тыл. У варожым тыле засталося некалькі груп, у т. л. група П. К. Папкова, на базе якой атрад створаны зноў.

З першых дзён акупацыі Суражскага раёна атрад «Бацькі Міная» павёў бязлітасную барацьбу з ворагам, рабіў засады на дарогах Сураж – Усвяты, Сураж – Веліж, Веліж – Усвяты, нападаў на варожыя гарнізоны. Акупанты аб’явілі раён дзеяння атрада «зонай партызан». У верасні 1941 г. атрад разграміў гарнізон у г. п. Сураж.

На дзень злучэння з часцямі Чырвонай арміі атрад налічваў 222 партызаны.