Дата нараджэння: 01 (14).02.1901

Дата смерці: 17.10.1982

Месца нараджэння: с. Грушка (цяпер у Тлумацкім раёне Івана-Франкоўскай вобласці Украіны)

Цімчук Іван Мацвеевіч – адзін з арганізатараў і кіраўнікоў падпольнай барацьбы і партызанскага руху на тэрыторыі Беларусі. Герой Савецкага Саюза (1944).

У 1919–1926 гг. праходзіў службу ў Чырвонай арміі, удзельнік грамадзянскай вайны. У 1924 годзе скончыў Смаленскае ваенна-палітычнае вучылішча, у 1929 годзе – Харкаўскі камуністычны ўніверсітэт. Працаваў дырэктарам Знаменскага сельскагаспадарчага вучэбнага камбіната ў 1929–1932 гг. У 1932 г. быў пераведзены ў Мінск. Працаваў намеснікам дырэктара трэста, дырэктарам саўгаса імя І. В. Сталіна Дзяржынскага раёна, дырэктарам саўгаса «Бальшавік» Мінскага раёна. З 1939 г. і да пачатку Вялікай Айчыннай вайны арганізаваў і ўзначальваў 1-ы Беларускі зверасаўгас у в. Людзвінава Вілейскай вобласці.

З пачатку Вялікай Айчыннай вайны ўдзельнічаў у падпольным руху і партызанскай барацьбе, кіраваў партыйнай арганізацыяй і падпольнымі групамі Лагойскага раёна. У лютым 1942 г. – лютым 1943 г. – камісар партызанскага атрада «Мсціўца» Мінскай вобласці, на базе якога створана партызанская брыгада «Народныя мсціўцы» імя Варанянскага, з лістапада 1942 г. – сакратар Лагойскага падпольнага райкама КП(б)Б. З верасня 1943 г. – камісар, а ў маі–ліпені 1944 г. – камандзір 1-й Антыфашысцкай партызанскай брыгады, якая дзейнічала на тэрыторыі Мінскай і Віцебскай абласцей.

Пасля вызвалення Беларусі І. М. Цімчук працаваў намеснікам старшыні Дзяржплана БССР, старшынёй Дзяржаўнага камітэта Савета Міністраў БССР па ахове прыроды. У 1956 годзе скончыў Вышэйшую партыйную школу пры ЦК КПСС. Пражываў у Мінску.

Памёр 17 кастрычніка 1982 года, пахаваны на Усходніх могілках Мінска.

УШАНАВАННЕ

І. М. Цімчуку як першаму дырэктару 1-га Беларускага зверасаўгаса ў 2007 г. устаноўлены памятны знак каля адміністрацыйнага будынка РСУП «Першы Беларускі» ў аг. Людзвінава Вілейскага раёна Мінскай вобласці.

Па вуліцы Цімчука, 1 у г. Лагойску ўсталявана мемарыяльная дошка ў гонар героя. Таксама мемарыяльная дошка ўстаноўлена ў г. Мінску, на вул. Пуліхава, 35, дзе жыў Іван Мацвеевіч.

Імя Героя Савецкага Саюза Івана Мацвеевіча Цімчука ўганаравана на Алеі Герояў і Алеі Славы Вілейскага раёна.

Указам Прэзідыума Вярхоўнага Савета СССР ад 1 студзеня 1944 года за ўзорнае выкананне баявых заданняў у тыле ворага і асаблівыя заслугі ў развіцці партызанскага руху ў Беларусі Цімчуку Івану Мацвеевічу прысвоена званне Героя Савецкага Саюза. І. М. Цімчук узнагароджаны ордэнамі Леніна (двойчы), Працоўнага Чырвонага Сцяга, Чырвонай Зоркі, «Знак Пашаны».