Дата нараджэння: 05.05.1923

Дата смерці: 20.06.1975

Месца нараджэння: в. Ярмошанкі, Смаленскі павет, Смаленская губерня

Ягораў Міхаіл Аляксеевіч – партызан Смаленскай партызанскай брыгады Віцебскай вобласці, пазней – разведчык 756-га стралковага палка 150-й стралковай дывізіі 3-й ударнай арміі 1-га Беларускага фронта. Разам з Мелітонам Кантарыя ўзнёс Знамя Перамогі над Рэйхстагам. Герой Савецкага Саюза (1946).

Нарадзіўся ў сялянскай сям’і. Атрымаў пачатковую адукацыю. З 14 гадоў працаваў у калгасе. Перад пачаткам вайны сям’я пераехала ў в. Бардзіна Руднянскага раёна Смаленскай вобласці. Калі пачалася вайна, пайшоў у партызаны, займаўся разведкай і дыверсіямі. Ваяваў у партызанскіх атрадах Баці, Грышына. Пусціў пад адхон пяць варожых эшалонаў. Быў накіраваны ў дыверсійны полк Садчыкава, дзе два гады ўзрываў масты, пускаў пад адхон эшалоны, падпальваў аўтамашыны ворага.

У 1943 годзе партызанская брыгада «Полк Садчыкава» па распараджэнні начальніка Цэнтральнага Штаба Партызанскага Руху П. Панамарэнкі была перадыслацыравана ў Полацка-Лепельскую партызанскую зону. Міхаіл Ягораў як баец партызанскай разведкі брыгады ўдзельнічаў у партызанскім прарыве фашысцкага акружэння пад Ушачамі ў ноч на 5 мая 1944 года.

Са снежня 1944 гада Міхаіл Ягораў – разведчык 756-га стралковага палка 150-й стралковай дывізіі 3-й ударнай арміі 1-га Беларускага фронта.

Разам з малодшым сержантам Мелітонам Кантарыя Міхаіл Ягораў ўзнёс Знамя Перамогі на даху Рэйхстага падчас штурму будынка. За гэты подзвіг М. А. Ягораву было прысвоена званне Героя Савецкага Саюза з уручэннем ордэна Леніна і медаля Залатая Зорка.

Да 1947 года Міхаіл Ягораў служыў у радах Чырвонай Арміі. Пасля дэмабілізацыі працаваў старшынёй калгасаў «Чырвоны маяк» і імя Молатава на Смаленшчыне. У 1954 годзе скончыў Смаленскую партшколу, пераехаў у г. Рудня Смаленскай вобласці. Працаваў на Руднянскім малочна-кансервавым камбінаце.

Загінуў у аўтакатастрофе 20 чэрвеня 1975 года. Пахаваны ў скверы Памяці Герояў у г. Смаленску.

УШАНАВАННЕ

Ганаровы грамадзянін г. Смаленска.

У г. Рудня ў доме, дзе жыў М. А. Ягораў, адкрыты мемарыяльны дом-музей яго імя.

У 2000 годзе ў г. Рудня ў Скверы ветэранаў і ў г. Смаленску каля магілы М. А. Ягорава былі адкрыты бюсты М. А. Ягорава (скульптар А. Сяргееў).

Імем Героя Савецкага Саюза Міхаіла Аляксеевіча Ягорава названы завулак у пасёлку Манастыршчына Смаленскай вобл., вуліца ў пасёлку Пасава г. Смаленска, у вёсцы Барысавічы Пскоўскай вобласці. На малакакамбінаце ў г. Рудня і доме Героя ўстаноўлены мемарыяльныя дошкі.

Вобраз Міхаіла Ягорава ўвасоблены ў кінематографе: «Падение Берлина» (1950, Дзмітрый Дубаў), «Освобождение» (1972, Генадзь Крашаніннікаў), «Перевал Дятлова» (2020, Даніла Іваноў).