Дата нараджэння: 15.04.1913

Дата смерці: 24.06.1995

Месца нараджэння: в. Навапакроўка, Томская губерня, Расійская імперыя (цяпер Імжорскі р-н, Кемераўская вобл., Расія)

Пруднікаў Міхаіл Сідаравіч нарадзіўся 15 красавіка 1913 года ў вёсцы Новапакроўка Томскай губерні (цяпер Імжорскі раён Кемераўскай вобласці).

Скончыў няпоўную сярэднюю школу. У 1930 годзе па пуцёўцы камсамола быў накіраваны ў рачны флот. Служыў матросам на буксірным параходзе «Новасібірск». У 1931 годзе сібірскія рачнікі праводзілі Пруднікава на ваенную службу. Ён пайшоў добраахвотнікам у памежныя войскі. Удзельнічаў у ліквідацыі басмацкіх банд у каракумскіх пясках і гарах Паміра.

Вялікая Айчынная вайна заспела капітана Пруднікава ў Маскве. Ён заканчваў Вышэйшую пагранічную школу. Як дасведчанага камандзіра, у якога ўжо быў вопыт баявых дзеянняў, Міхаіла Сідаравіча прызначылі камандзірам кулямётнай роты, затым батальёна асаблівага прызначэння НКУС СССР.

У лістападзе 1941 года батальён пайшоў на фронт абараняць сталіцу. Вясной 1942 года Міхаіл Пруднікаў па асабістай просьбе атрымаў новае прызначэнне. Ён узначаліў групу, якую сфарміравалі з памежнікаў-чэкістаў і закінулі ў тыл ворага на тэрыторыю Віцебскай вобласці.

З сакавіка 1942 года Пруднікаў знаходзіўся ў Полацкім раёне, быў камандзірам спецыяльнага атрада, затым да мая 1943 года – партызанскай брыгады «Няўлоўныя». Брыгада аб’ядноўвала 16 дзейных атрадаў, якія разгарнулі дыверсійную дзейнасць на чыгунцы ў накірунку з Полацка на Віцебск, Ветрына, Невель, Даўгаўпілс. Акрамя дзвюх з паловай тысяч партызан брыгада мела рэзерв – больш за 900 чалавек. Падпалкоўнік Пруднікаў умела кіраваў баявымі дзеяннямі партызан у Віцебскай і Баранавіцкай абласцях. Адна са значных аперацый «Няўлоўных» – эвакуацыя дзяцей з дзіцячага дома з акупаванай тэрыторыі. Іншая, не менш значная аперацыя – вызваленне суайчыннікаў з турмы.

У верасні 1943 года Міхаіл Пруднікаў быў удастоены звання Героя Савецкага Саюза.

Калі ў кастрычніку 1943 года злучэнні Прыбалтыйскага і Калінінскага франтоў вызвалілі горад Невель і падышлі да Віцебска, партызанская брыгада «Няўлоўныя» вяла жорсткія баі з праціўнікам і ў рэшце рэшт здзейсніла цяжкі пераход у Заходнюю Беларусь.

За два гады баявых дзеянняў на беларускай зямлі «Няўлоўнымі» было забіта і паранена звыш 51 тыс. нямецкіх салдат і афіцэраў, пушчаны пад адхон 511 эшалонаў, выведзены са строю 104 масты, 45 прадпрыемстваў, знішчаны 10 самалётаў, 12 бронецягнікоў, больш за 80 аўтамашын, 6 складоў.

З 1943 года Міхаіл Сідаравіч Пруднікаў служыў у цэнтральным апараце Міністэрства дзяржаўнай бяспекі СССР. З мая 1945 года ён быў начальнікам аддзела 4-га ўпраўлення НКДБ СССР, у тым жа годзе знаходзіўся ў працяглай камандзіроўцы ў Германіі. У 1953 годзе скончыў Ваенна-юрыдычную акадэмію. З 1954 года працаваў у Камітэце дзяржаўнай бяспекі пры Савеце Міністраў СССР, займаўся выкладчыцкай дзейнасцю, рыхтуючы будучых афіцэраў дзяржбяспекі і памежных войскаў. На кароткі тэрмін быў прызначаны начальнікам разведкі Галоўнага ўпраўлення памежных войскаў.

У 1970 годзе пастановай Савета Міністраў СССР палкоўніку Міхаілу Пруднікаву было прысвоена воінскае званне «генерал-маёр». Ён узнагароджаны двума ордэнамі Леніна, двума ордэнамі Чырвонага Сцяга, ордэнам Айчыннай вайны I ступені, двума ордэнамі Чырвонай Зоркі, медалямі.

З 1975 года – Член Саюза пісьменнікаў СССР.

З 1980-х гадоў генерал-маёр Міхаіл Сідаравіч Пруднікаў у адстаўцы. Жыў у Маскве. Памёр у 1995 годзе. Пахаваны на Траякураўскіх могілках у Маскве.

Герою Савецкага Саюза, камандзіру партызанскай брыгады «Няўлоўныя» ў Маскве, Мінску, Полацку і Новасібірску прысвечаны экспазіцыі ў музеях.